被夾响中國同印度中間嘅不丹，响公元7世紀起係吐蕃王朝屬地，直到9世紀先成為獨立部落，深受西藏文化嘅影響。

宜家嘅不丹依然奉藏傳佛教為國教，最高宗教領袖基堪布總管全國宗教事務，地位僅次於國王。但其實佛教係後期先成為吐蕃國教，吐蕃一開始有自己嘅宗教——苯教。而佛教响吐蕃第二十七代贊普拉托脫日年贊時期（即公元4世紀）先開始傳入吐蕃，果陣佛教嘅法典已經被帶到吐蕃，但因為拉托脫日年贊唔識字，更加唔明法典嘅含義，所以就算果陣吐蕃已經珍藏咗少量佛經同宗教物品，佛教依然都冇响佢統治嘅年代傳播開去。不過其實都唔怪拉托脫日年贊唔識字，因為果陣吐蕃根本未有自己嘅文字，更加唔會去翻譯經書。藏文嘅出現，最早都要追溯到松贊干布時期（即公元7世紀）。

相入面嘅祈楚拉康位於帕羅宗帕羅河谷，係不丹最古老的寺廟之一，當中第一聖殿就係由松贊干布所建，入面供奉嘅釋迦牟尼八歲等身像係不丹最神聖嘅佛像之一。